„Sæmilega öflugir“ síðdegisskúrir

Í dag verður suðlæg átt, víða 5-10 metrar á sekúndu og súld eða rigning með köflum, samkvæmt hugleiðingum veðurfræðings Veðurstofu Íslands. 

„Á norðaustanverðu landinu verður úrkomulítið fram eftir degi, en þar má búast við sæmilega öflugum síðdegisskúrum. Hiti 10 til 22 stig, hlýjast á Austurlandi.“

Í hugleiðingunum kemur fram að draga eigi úr vætu í kvöld. 

„En á morgun gengur í suðaustan 8-15 m/s með rigningu um landið sunnan- og vestanvert. Vindstyrkurinn getur orðið meiri í vindstrengjum við fjöll, t.a.m. á norðanverðu Snæfellsnesi, og þeir sem ferðast á húsbíl eða með aftanívagn eru hvattir til að skoða veðurathuganir áður en lagt er af stað. Norðaustan til á landinu verður hins vegar heldur hægari vindur og þurrt fram á kvöld.“

• Blogga um frétt