Býr til hlaðvarp um loðnuvertíðina og sjávarútveg

Í vikunni fór í loftið hlaðvarpið Loðnufréttir í umsjá Ingva Þórs Georgssonar, ritstjóra Loðnufrétta.is. Nú þegar eru tveir þættir komnir í loftið fyrir loðnuáhugamenn sem bíða eftir að fara að sjá og heyra sögur af vertíðinni.

„Í ljósi þess að vertíðin í ár verður mun skemmri en í fyrra sökum úthlutunar var ákveðið að bregða á það ráð að hita aðeins upp í staðinn og búa til 5-6 þætti fyrir þau allra hörðustu en hugmyndin er að sjálfsögðu líka að reyna að fá fleiri til að fylgjast með." segir Ingvi Þór.

Ingvi Þór Georgsson.

Í fyrsta þætti er tekin létt yfirferð á vertíðinni auk þess sem rætt er við Geir Zoega, skipstjóra á Polar Amaroq, en hann hefur getið af sér gott orð sem skipstjóri hér heima og í Grænlandi. Í þætti tvö var farið yfir verðmætasköpun síðustu vertíðar, aflatölur og spáð í spilin fyrir komandi vertíð.

Næstu þættir sem líta dagsins ljós eru samtöl við fólk sem stýrir hátæknivinnslum, markaðsmálum og tengdum iðnuðum til að kynnast því frá öllum hliðum hvernig loðnan hefur áhrif á efnahaginn, þjóðarsálina og sjávarútveg. Þá verður jafnframt fjallað um veiðarfæri, hvort betra sé að vera á loðnuflotvörpu eða nót við veiðarnar og margt fleira.

Ingvi Þór hefur undanfarna 12 mánuði halda úti hlaðvarpinu Pyngjan sem fjallar um ársreikninga fyrirtækja og viðskipti almennt ásamt Arnari Þór Ólafssyni.

Hlaðvarpið er aðgengilegt á öllum helstu hlaðvarpsveitum.

• Blogga um frétt