Breytingar verða á skipulagi, stjórn og framkvæmd skimunar fyrir krabbameinum um næstu áramót. Landspítali í samvinnu við Sjúkrahúsið á Akureyri tekur þá að sér framkvæmd skimunar fyrir krabbameinum í brjóstum og heilsugæslan um allt land framkvæmd skimunar fyrir krabbameinum í leghálsi.
Starfsemi Leitarstöðvar Krabbameinsfélagsins verður verður hætt um áramótin.
Markmið breytinganna er að færa verklag nær því skipulagi sem mælt er með í alþjóðlegum skimunarleiðbeiningum til að tryggja enn frekar öryggi og gæði og er jafnframt í samræmi við framtíðarsýn og meginmarkmið heilbrigðisstefnu til ársins 2030, að því er fram kemur í tilkynningu á vef heilbrigðisráðuneytisins.
Heilbrigðisráðherra kynnti í mars í fyrra tillögur að framtíðarfyrirkomulagi skimana fyrir krabbameinum. Í samræmi við tillögurnar og ákvörðun ráðherra frá því í júní 2020 taki opinberar stofnanir við skimuninni frá og með 1. janúar 2021.
Áhersla verður lögð á að yfirfærsla verkefnisins frá Leitarstöð Krabbameinsfélagsins til sjúkrahúsanna og heilsugæslunnar valdi sem minnstri röskun á þjónustu. Tímapantanir í skimun samkvæmt breyttu fyrirkomulagi hefjast í byrjun janúar.