Martin Hermannsson átti sannkallaðan stórleik þegar hann skoraði 20 stig fyrir Valencia gegn stórveldi Real Madríd í spænsku A-deildinni í körfuknattleik karla í gærkvöldi.
Real Madríd hafði að lokum 93:79 sigur en óhætt er að segja að Martin hafi gert allt sem í hans valdi stóð til þess að knýja fram góð úrslit fyrir Valencia.
Auk þess að skora 20 stig, sem er hans besti persónulegi árangur fyrir Valencia í spænsku deildinni, tók hann tvö fráköst og gaf sex stoðsendingar fyrir liðsfélaga sína.
Deildin hefur birt myndskeið með broti af því besta úr frábærum leik Martins í gærkvöldi á youtube-síðu sinni.
Tilþrif hans, sem eru réttilega nefnd „Sýning Martins Hermannssonar gegn Real Madríd,“ má sjá hér: