Tvö tré fuku upp með rótum í Reykjavík

Háannatími björgunarsveitanna vegna óveðursins var frá hádegi og fram á sjöunda tímann í dag. Verkefnin voru mismunandi en tvö tré í Reykjavík fuku upp með rótum á meðan lægðin reið yfir.

„Ég á eftir að sakna þessa gamla trés sem gafst líklega bara upp á okkur mannfólkinu hallaði sér upp að næsta húsi í vindinum áðan,“ segir Þröstur Guðlaugsson, ljósmyndari, í færslu á hverfasíðu Vesturbæinga þar sem hann sýndi myndir af björgunarsveitamönnum að eiga við tré sem fauk upp við Brávallagötu.

Frétt af mbl.is

Skelltu sér í æfingu í kolvitlausu roki (myndskeið)

Einkennilegustu verkefni dagsins

Davíð Már Bjarnason, upplýsingafulltrúi Landsbjargar, sagði að tilkynningarnar tvær hafi verið þær óvenjulegustu sem bárust  björgunarsveitum í dag: „Ég hef ekki heyrt af neinum tilkynningum um slys á fólki en það þurfti að eiga við þessi tré og saga þau niður.“

Tréð fauk upp en það var í grennd við Brávallagötu. Ljósmynd/Þröstur Guðlaugsson

Annasamast á suðvesturhorninu

Davíð segir önnur verkefni björgunarsveitanna hafa verið hefðbundnari. Trampólín á flugi og þakplötur að rifna sem Davíð segir meðal annars mega rekja til þess að vindáttin var ekki sú sama og í fyrri lægðum þessa árs.

„Hún náði að bíta á hluti sem lægðirnar hingað til hafa ekki bitið á,” segir Davíð.

Frétt af mbl.is

Björgunarsveitir kallaðar út á fimm stöðum

Eftir því sem leið á eftirmiðdegið lægðu vindar um allt land en mest var álagið á Suðurnesjum, í Vestmannaeyjum og á höfuðborgarsvæðinu.

Á sjöunda tímanum voru verkefni enn að berast björgunarsveitum en álagið að minnka statt og stöðugt.

Frétt af mbl.is

Hundleiðinlegt veður í dag

Næg verkefni biðu björgunarsveitamönnum á þökum landsmanna í dag, til að mynda í Vestmannaeyjum. Ljósmynd/Óskar Pétur Friðriksson

• Blogga um frétt