Jóhanna Lea Lúðvíksdóttir er komin áfram í átta manna úrslit á Opna breska áhugamannamótinu í golfi eftir sigur á hinni ensku Emily Toy í 16 manna úrslitunum í dag.
Leikið er í Kilmarnock í Skotlandi. Hefðbundinn höggleikur var leikinn á fyrstu tveimur hringjunum áður en holukeppni tók við.
Úrslitin réðust á 18. og síðustu holunni í dag. Jóhanna Lea var með einnar holu forskot fyrir síðustu holuna. Á henni léku Jóhanna Lea og Toy báðar á fimm höggum og vann íslenski kylfingurinn þar með nauman sigur.
Jóhanna Lea mætir hinni írsku Katie Lanigan í átta manna úrslitunum í fyrramálið.