Innlent

Staðnir að verki grunaðir um inn­brotin

Viktor Örn Ásgeirsson skrifar
Mennirnir voru handteknir á vettvangi.
Mennirnir voru handteknir á vettvangi. Getty Images

Þrír voru handteknir í Gerðunum í dag grunaðir um innbrot í geymslur á svæðinu. Einstaklingarnir voru vistaðir í fangageymslu í þágu rannsóknar málsins. Meintu þýfi hefur verið skilað til eigenda.

Málið er í rannsókn, að því er segir í dagbók lögreglunnar á höfuðborgarsvæðinu þar sem fjallað er um verkefni dagsins í dag.

Lögreglu barst tilkynning um mann sem svaf í ruslageymslu í Túnunum fyrr í dag. Hann reyndist vera vopnaður hnífi sem gerður var upptækur. Maðurinn verður kærður fyrir brot á vopnalögum.

Þá hafði lögreglan afskipti af manni á ónefndri stofnun í Austurbæ. Sá hafði stolið hreinsunarspritti og drukkið, eins segir í dagbók lögreglu. Hann fór vandræðalaust af vettvangi.

Óskað var eftir aðstoð lögreglu í Breiðholtslaug vegna manns sem ætlaði í sund án þess að borga. Maðurinn hafði ekki sundföt meðferðis og lögregla vísaði honum frá vegna háttseminnar.

Þrívegis var tilkynnt um sinubruna; í Garðabæ, við Flataskóla og í efra Breiðholti. Vel gekk að slökkva eldinn og slökkvilið hefur tryggt aðstæður.

Lögreglumál Reykjavík
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið