Þorsteinn, Bryndís, Guido og Stjörnu-Sævar til KPMG

KPMG hefur nýlega fengið til starfa fjóra nýja sérfræðinga, þau Bryndísi Gunnlaugsdóttur, Guido Picus, Sævar Helga Bragason og Þorstein Guðbrandsson.

Bryndís gefur sveitarfélögum ráð

Í tilkynningu segir að Bryndís hafi hafið störf í ráðgjöf og muni sérhæfa sig í þjónustu við ríki og sveitarfélög.

Bryndís starfaði áður sem lögfræðingur hjá Sambandi íslenskra sveitarfélaga, fyrirtækjaskrá ríkisskattstjóra og Útlendingastofnun.

Hún var forseti bæjarstjórnar Grindavíkurbæjar árin 2010-2014 og hefur setið í fjölda stjórna, nefnda og ráða fyrir bæði sveitarfélög og ríki. Bryndís er með BA- og ML-próf í lögfræði frá Háskólanum í Reykjavík. 

Guido aðstoðar fyrirtæki

Guido hefur hafið störf í ráðgjöf og mun sérhæfa sig í því að aðstoða fyrirtæki og opinbera aðila við úttekt, skipulagningu og innleiðingu á stafrænum umbreytingum.

Guido hefur yfir 20 ára reynslu frá London, Munchen og Quito og hefur áður starfað hjá Amazon, Deloitte og Futura Innovation Lab. Hann lærði greiningu og hönnun kerfa í Suður-Karólínuháskóla og er með MBA-gráðu frá Edinborgarháskóla.

Sævar í sjálfbærni

Sævar hefur hafið störf í ráðgjöf og mun sérhæfa sig í sjálfbærni og umhverfismálum. Sævar er jarðfræðingur að mennt, kennari, dagskrárgerðarmaður í sjónvarpi og útvarpi auk þess að vera rithöfundur.

Hefur hann ekki síst verið þekktur undir viðurnefninu Stjörnu-Sævar, sökum mikils áhuga á himingeimnum.

Hann starfaði áður í teymi loftslags og græns samfélags hjá Umhverfisstofnun, auk þess að starfa sjálfstætt við ýmis verkefni sem tengjast vísindamiðlun.

Þorsteinn kemur frá Texas

Þorsteinn hefur hafið störf í ráðgjöf og mun sérhæfa sig á sviði fjármála- og rekstrarráðgjafar. Þorsteinn er viðskiptafræðingur með yfir 20 ára reynslu af kaupum og sölu fyrirtækja og hefur leitt tugi viðskipta með fyrirtæki, bæði hér á landi og erlendis. 

Auk fyrirtækjaviðskipta hefur Þorsteinn víðtæka reynslu að fyrirtækjarekstri og starfaði um árabil í upplýsingatækni, áður en hann fór til starfa á fyrirtækjasviði Straums-Burðaráss, fjárfestingabanka.

Undanfarin 14 ár hefur Þorsteinn búið í Austin, Texas þar sem hann hefur starfað sjálfstætt við fjármála-, fjárfestinga- og rekstrarráðgjöf.

60 starfsmenn við ráðgjöf

Í tilkynningunni er tekið fram að KPMG veiti fyrirtækjum fjölbreytta þjónustu á sviði ráðgjafar. Starfa um 60 sérfræðingar við ráðgjöf hjá félaginu.

Að auki vinnum við mikið með öðrum aðildarfyrirtækjum KPMG um allan heim til þess að draga að bestu þekkingu í þeim verkefnum sem við tökum að okkur. Viðskiptavinir okkar í ráðgjöf eru fyrirtæki af öllum stærðum, sveitarfélög og aðrir opinberir aðilar.

• Blogga um frétt