Íslandsmeistarar Víkings áttu ekki í miklum erfiðleikum með nýliða Fram, en þeir unnu þægilegan heimasigur, 4:1 á Frömurum í 5. umferð Bestu deildar karla í gær.
Nokkuð jafnræði var í byrjun leiksins og áttu Framarar tvær álitlegar sóknir áður en Helgi Guðjónsson skoraði fyrsta mark Víkings. Heimamenn áttu heldur meira í leiknum það sem eftir lifði fyrri hálfleiks, en Erlingur Agnarsson skoraði annað mark Víkings á 21. mínútu eftir mistök í vörn Framara.
Hann var svo aftur á ferðinni um fimm mínútum síðar, en þá átti Kristall Máni langa sendingu innfyrir vörn Framara beint á Erling, sem var þá einn á auðum sjó. Tók hann laglega gabbhreyfingu og renndi boltanum í opið markið.
Víkingar hófu síðari hálfleikinn af krafti, en Framarar unnu sig vel inn í hann. Þeir uppskáru fyrir erfiði sitt á 61. mínútu þegar Hlynur Atli Magnússon, fyrirliði Framara, fékk boltann á góðum stað við hægra vítateigshornið. Hann tók Loga Tómasson á og skaut boltanum fast. Ingvar hafði hendur á boltanum en gat ekki komið í veg fyrir markið.
Næstu mínúturnar leit út fyrir að Framarar ætluðu að stríða Íslandsmeisturunum, en á 67. mínútu kom náðarhöggið þegar Birnir Snær Ingason gaf boltann fyrir mark Framara. Þar varð Delphin Tshiembe fyrir því óláni að reka fótinn í knöttinn og í eigið net.
Úrslitin voru þá ráðin. Þó að liðin skiptust á að sækja var eins og það vantaði örlítið upp á kraftinn hjá báðum liðum og 4:1 Víkingssigur staðreynd.
Víkingar eru eflaust mjög sáttir með stigin þrjú, þó að ekki hafi reynt mikið á þá við að landa þeim. Framarar munu hins vegar horfa til þess að þeir náðu ágætum spilköflum inn á milli, og að það vantaði ekki mikið upp á að staðan yrði 3:2 í stað 4:1. Ef og hefði gefur hins vegar fá stig og bæði lið vilja eflaust bæta sig fyrir næstu leiki, en þá mætir Víkingur toppliði Breiðabliks, og Framarar mæta Leiknismönnum.