ESA samþykkir losunarúthlutanir fyrir Ísland og Noreg

Eftirlitsstofnun EFTA (ESA) samþykkti í dag útfærslur að árlegum losunarúthlutunum fyrir Ísland og Noreg fyrir tímabilið 2021 til 2030 í samræmi við reglugerð um sameiginlega ábyrgð. 

Fram kemur í tilkynningu frá EFTA að um sé að ræða mikilvægt skref til að tryggja að Ísland og Noregur nái markmiðum um takmörkun á losun gróðurhúsalofttegunda fyrir árið 2030 í starfsemi sem viðskiptakerfi Evrópusambandsins fyrir losunarheimildir tekur ekki til. 

Reglugerðin um sameiginlega ábyrgð tilgreinir bindandi skerðingu á losun gróðurhúsalofttegunda fyrir Ísland, Noreg og aðildarríki ESB til 2030. Þetta nær til losunar í geirum sem eru fyrir utan viðskiptakerfið, þ.m.t. í samgöngum, byggingaframkvæmdum, landbúnaði, öðrum iðnaði og úrgangsstjórnun.

Ákvörðun ESA í dag kemur í kjölfar þess að löggjöfin hefur nú verið tekin upp í EES-samninginn, og yfirfærir markmið um samdrátt í losun til 2030 yfir í árlegar losunarúthlutanir fyrir árin 2021 til 2030. Árlegar losunarúthlutanir eru ákvarðaðar með tilliti til tonna koltvísýringsígilda fyrir hvert ár eftir línulegum ferli milli áranna 2021 og 2030.

• Blogga um frétt