Tilkynna töluverðan koparfund í Grænlandi

Amaroq Minerals ltd., auðlindafélag sem heldur um víðtæk rannsókna- og vinnsluheimildir á Grænlandi, hefur birt niðurstöður rannsókna ársins 2022 á þróunarsvæðinu Kobberminebugt á Suður-Grænlandi.

Fram kemur í tilkynningu að málar hafi fundist í umtalsverðu magni í tengslum við umbreytingaberg á svæðinu. Gefur fundurinn tilefni til að ætla að fjöldi svipaðra svæða sé að finna á um 40 km löngu granítsnertisvæði sem verður kannað betur á þessu ári.

Sýni sem voru tekin við Josva-kopnarnámuna voru með allt að 4,2% koparmagn á 2,5 metra breiðu belti og allt að 11,6% koparmagn á ríflega 50 sentímetra breiðu belti.

Frétt af mbl.is

Verðmeta Amaroq rúmlega helmingi hærra en markaðurinn

Benda til umtalsverðrar koparmyndunar

„Félagið heldur áfram rannsóknum á svæðum sem innihalda efnahagslega mikilvæga málma og sýna þessar rannsóknir enn betur fram á jarðfræðilega möguleika Suður-Grænlands. Þessar niðurstöður benda til umtalsverðrar koparmyndunar í vesturenda steinefnabeltisins sem Amaroq er að kanna,“ segir Eldur Ólafsson, forstjóri Amaroq, í tilkynningunni.

„Hátt málmhlutfall í berginu við Kobberminebugt kemur ekki á óvart í ljósi sögulegrar smánámuvinnslu á svæðinu og teymið okkar vinnur nú náið að því að bera kennsl á fleiri æðar og svæði sem hægt er að vinna. Markmiðið er að finna nægilegt vinnanlegt magn af kopar til að tryggja hagkvæmni framtíðarvinnslu á svæðinu. Við munum halda áfram rannsóknum á þessu ári og ég hlakka til að kynna fleiri jákvæðar niðurstöður um þetta á næstunni,” segir hann.

Amaroq Minerals var stofnað árið 2017 með megináherslu á gullleit og gullrannsóknir á Grænlandi. Fyrirtækið er með leyfi til að leita að og vinna gull og aðra verðmæta málma á Suður-Grænlandi. Stærsta eign Amaroq  er Nalunaq-gullnáman, sem verið er að koma aftur í vinnslu.

Hlutabréf Amaroq eru skráð á mörkuðum í borgunum Toronto og London. Meðal stærstu hluthafa í félaginu eru íslenskir fjárfestar, þjóðarsjóðir Grænlands og Danmerkur og stærsti lífeyrissjóður Grænlands. 

• Blogga um frétt