Strandveiðar fóru af stað af krafti í fyrrinótt, einstakt veður og góður afli fyrir vestan, en eitthvað breytilegt eftir landshlutum. Sigurður Hjartarson í Bolungarvík fór út um klukkan þrjú í fyrrinótt á bát sínum Hirti Stapa ÍS-124 og var kominn að landi um klukkan 10 í gærmorgun með dagsskammtinn.

„Það er bara dásamlegt að geta farið á sjó þegar sjólagið breytist ekkert hvort sem þú ert við bryggju inni í höfn eða úti á miðunum. Þetta var himnaríkisblíða og ég held að það hafi verið nýheflað og rennislétt alla leið til Grænlands,“ segir Sigurður.

Hoppað á milli hóla

Hann áætlar að 15 strandveiðibátar hafi róið frá Bolungarvík í gær, en þeim eigi sjálfsagt eftir að fjölga eitthvað. Bátur hans er tæplega níu metra langur, Sómi 870, og gengur um 20 mílur í góðu veðri eins og í gær. Fyrsti krókur var kominn í sjó nokkrar mílur út af Aðalvík klukkan fjögur og skammturinn kominn um borð um klukkan níu.

„Þetta gekk ágætlega, maður hoppaði svona á milli hóla eins og þurfti til að fá fisk. Það var mikið líf þarna og nú er síðasta loðnan að lognast út af. Ég held að það hafi almennt verið ágætt fiskirí og það er fínasta spá út vikuna. Vonandi verður verðið á mörkuðum ekki verra en í fyrra. Þá byrjaði það lágt, en lagaðist þegar komið var fram í miðjan maí.“

Sigurður stundar handfæraveiðar allan ársins hring eftir því sem veður leyfir og hefur gert í mörg ár. Yfir vetrartímann leigir hann heimildir og síðan taka strandveiðar við yfir sumartímann.

Frétt af mbl.is

Drónar við eftirlit með strandveiðum

Tengdar fréttir

Smábátaveiðar

Ánægður með nýja Sigrúnu Björk ÞH

• Lokun Skápsins tvímælalaust að skila sér
• „Leggjum línuna hvenær sem veður leyfir“
• Náðu 10 tonnum í mokveiði
• Fordæma vinnubrögð og mótmæla tillögum

» Fleiri tengdar fréttir