Róbert Orri Þorkelsson, leikmaður Breiðabliks, er á leiðinni til Montréal í MLS-deildinni en liðið hefur gert tilboð í kappann samkvæmt heimildum Dr. Football. Þetta kom fram í hlaðvarpsþætti þeirra félaga í gærkvöldi.

Valur tók á móti Breiðablik í Pepsi-Max deildinni í gær og unnu heimamenn 3-1 sigur. Róbert Orri var fjarri góðu gamni en hann hefur verið að glíma við meiðsli.

Róbert Orri hefur aðeins byrjað 12 deildarleiki fyrir Breiðablik frá því að hann yfirgaf Aftureldingu. Hann hefur því ekki spilað mikið fyrir félagið en samt sem áður vakið athygli eins og Hjörvar Hafliðason segir í Dr. Football.

„Montreal að sækja 19 ára gamlan Íslending. Þetta er áhugavert og mjög spennandi,“ sagði Hjörvar Hafliðason.

„Montréal er með sömu eigendur og Bologna og þeir þekkja íslenska systemið vel. Þeir eru mikið farnir að sækja í Norðurlandabúa og hafa verið að sækja úr Allsvenska,“ sagði Keli í Dr. Football.

„Ef Blikar ná að selja hann þá verð ég bara að segja að þetta business módel þeirra að selja unga leikmenn sem hafa verið efnilegir í yngri landsliðinum er bara að virka,“ bætti Hjörvar við í hlaðvarpsþættinum Dr. Football.