Newcastle United verður á meðal liða sem tekur þátt í riðlakeppni Meistaradeildar Evrópu á næstu leiktíð. Liðið tryggði sætið með markalausu jafntefli gegn Leicester í kvöld.
Newcastle var miklu sterkari aðili leiksins en tókst ekki að skora mark og Leicester varðist af miklum krafti.
Leicester átti ekki marktilraun í leiknum fyrr en í uppbótartíma og upplegið var að verjast og halda hreinu.
Stigið kemur Newcastle í 70 stig og á Liverpool í fimmta sætinu ekki lengur möguleika á að ná þeim þegar ein umferð er eftir.
Manchester United þarf einnig að sækja stig í næstu tveimur leikjum liðsins til að tryggja það að ná í sæti í Meistaradeildinni.
Stigið fyrir Leicester gæti reynst dýrmætt en liðið er þó í fallsæti. Liðið er með 31 stig eftir kvöldið og er þremur stigum á eftir Everton fyrir lokaumferðina.