Erlent

Leyfir Twitter á ný

Viktor Örn Ásgeirsson skrifar
Muhammadu Buhari forseti Nígeríu.
Muhammadu Buhari forseti Nígeríu. Getty/Dennis-Pool

Forseti Nígeríu hefur nú tekið ákvörðun um að leyfa notkun samfélagsmiðilsins Twitter aftur. Bannið hafði varað í sjö mánuði eða síðan í júní á síðasta ári.

Forsögu málsins má rekja til þess að stjórnvöld í Nígeríu sögðu samfélagsmiðilinn tilvalinn vettvang fyrir stjórnarandstæðinga til að grafa undir samstöðu í landinu. Tekin var ákvörðun um að banna miðilinn í kjölfarið.

Aðeins tveimur dögum áður stjórnvöld bönnuðu Twitter hafði samfélagsmiðillinn eytt tísti (e. tweet) frá Muhammadu Buhari, forseta Nígeríu, sem talið var brjóta gegn reglum miðilsins um ofbeldi. Forsetinn tísti um baráttu aðskilnaðarsinna í landinu og kvaðst ætla að mæta óeirðum af hörku.

Í tístinu vísaði forsetinn til borgarastyrjaldar sem var á tímabilinu 1967 til 1970 og sagði að þeir sem gættu ekki að sér fengju að finna fyrir því.

Forsetinn virðist nú hafa tekið miðilinn í sátt en í frétt CNN um málið segir að Twitter hafi samþykkt að fylgja öllum skilyrðum sem stjórnvöld í Nígeríu hafa sett fyrir notkun miðilsins. Meðal skilyrða eru að samfélagsmiðillinn fylgi lögum landsins.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×