Handtekinn eftir snarpa eftirför

Lögreglunni á lögreglustöðinni á Hverfisgötu var í þrígang tilkynnt um fólk í annarlegu ástandi.

Í einu tilvikanna fór lögreglan með sjúkrabifreið á staðinn vegna vímuástands viðkomandi. Málin voru leyst án íþyngjandi aðgerða, að því er segir í dagbók lögreglunnar á höfuðborgarsvæðinu vegna verkefna frá klukkan 17 í gær til klukkan 5 í morgun.

Í sama umdæmi lögreglunnar var ökumaður handtekinn eftir snarpa eftirför grunaður um akstur undir áhrifum fíkniefna og fleiri umferðarlagabrot.

mbl.is/Eggert Jóhannesson

Sömuleiðis voru maður og kona handtekin vegna gruns um akstur undir áhrifum og þjófnað.

Í umdæmi lögreglunnar í Hafnarfirði og Garðabæ voru afskipti höfð af manni vegna vörslu fíkniefna og brots á vopnalögum. Málinu lauk með skýrslutöku á vettvangi.

Ólæti við verslunarmiðstöð

Tilkynnt var um umferðaróhapp í umdæmi lögreglunnar í Kópavogi og Breiðholti. Ein bifreið var óökuhæf á eftir og urðu smávægileg meiðsli á fólki. Sjúkrabifreið var send á staðinn.

Einnig var tilkynnt um að ungmenni hefðu verið með ólæti við verslunarmiðstöð. Ekki var gripið til aðgerða en umgengni þeirra var slæm.

mbl.is/Eggert Jóhannesson

Tilkynnt var um krakka á skellinöðrum í utanvegaakstri í umdæmi lögreglunnar í Grafarvogi, Árbæ og Mosfellsbæ. Lögreglunni tókst ekki að hafa uppi á þeim.

• Blogga um frétt