Valur tapaði óvænt gegn ÍA, 2-1, í síðasta leik liðsis í Pepsi Max-deild karla. Þetta er annað tímabilið í röð þar sem Valur tapar gegn Skagamönnum. Á síðustu leiktíð fór liðið á mikið flug í kjölfarið.
Það var í fjórðu umferð í fyrra þar sem Valur tapaði 1-4 á heimavelli gegn ÍA. Í kjölfarið fór fyrrnefnda liðið í gegnum restina af mótinu án þess að tapa leik.
Nánar til tekið sigraði Valur tólf leiki og gerði jafntefli í tveimur. Liðið varð að lokum Íslandsmeistari með yfirburðum. Þess skal getið að keppni var hætt eftir 18 umferðir í fyrra vegna kórónuveirufaraldursins.
Tap Vals gegn ÍA á dögunum var ansi óvænt. Íslandsmeistararnir voru ólíkir sjálfum sér í leiknum. Það er þó spurning hvort að tapið verði til þess að liðið verði jafn óstöðvandi og raun bara vitni á síðustu leiktíð.
Valur er á toppi deildarinnar með 27 stig, stigi meira en Víkingur og 4 stigum meira en Breiðablik. Síðastnefnda liðið á þó leik til góða.