Hafnar því að hafa verið látinn gossa vegna vindlosunar

Knattspyrnumaðurinn Marcelo, miðvörður Bordeaux, hafnar því alfarið að hafa verið látinn fara frá Lyon vegna ófagmannlegrar hegðunar í búningsklefa liðsins, þar á meðal að leysa ítrekað vind og hlæja á óviðeigandi tímapunktum.

L’Equipe greindi frá því fyrr í vikunni að Marcelo hafi verið færður úr aðalliði Lyon niður í varaliðið, þar sem hann æfði og lék um skeið, áður en hann var svo seldur til Bordeaux í janúarglugganum vegna þessa.

Marcelo fann sig knúinn til þess að endurvekja twitteraðgang sinn til þess að svara fyrir þessar ásakanir.

„Þökk sé L‘Equipe sný ég aftur á twitter eftir langan tíma til þess að hafna öllum ásökununum. Blaðamennska nú til dags er grín!“ skrifaði hann. Um var að ræða fyrstu færslu hans á samfélagsmiðlinum í um eitt ár.

Í ágúst á síðasta ári hafði verið greint frá því að Marcelo hafi skellihlegið yfir ræðu Léo Dubois, fyrirliða Lyon, eftir stórt tap gegn Angers þar sem Marcelo skoraði til að mynda sjálfsmark.

• Blogga um frétt