Ökumaðurinn sem var stöðvaður í Hafnarfirðinum í gærkvöldi var vistaður í fangageymslum lögreglu og eins farþegi í bifreiðinni enda sakaðir um fjölda brota.
Samkvæmt dagbók lögreglu er maðurinn grunaður um akstur bifreiðar undir áhrifum fíkniefna, ítrekaðan akstur bifreiðar sviptur ökuréttindum, eignaspjöll en hann braut rúðu í lögreglubifreiðinni og vörslu fíkniefna. Farþegi í bifreiðinni var handtekinn grunaður um vörslu fíkniefna og var hann einnig vistaður fyrir rannsókn máls í fangageymslu lögreglu.
Um átta í gærkvöldi handtók lögreglan eftirlýstan mann í miðborginni sem er einnig grunaður um vörslu fíkniefna. Maðurinn var vistaður fyrir rannsókn máls í fangageymslu lögreglu.
Lögreglan stöðvaði för bifreiðar í Árbænum síðdegis í gær en ökumaðurinn er grunaður um akstur bifreiðar undir áhrifum fíkniefna. Hann var með börn í bifreiðinni og var málið unnið með barnavernd.
Vista þurfti mann í annarlegu ástandi í fangageymslum lögreglu í nótt eftir að ítrekað var tilkynnt um ástand hans til lögreglu í gærkvöldi.
Kona var flutt á bráðamóttöku Landspítalans í gærkvöldi eftir að hafa dottið á merktri gönguleið við fellið Lala, skammt frá Hafravatni. Hún var með áverka á öxl samkvæmt dagbók lögreglu.
Lögreglan fjarlægði skráningarmerki af á annan tug bifreiða í gærkvöldi og nótt þar sem þær höfðu ekki verið færðar til skoðunar á réttum tíma eða voru ótryggðar.