Á móti frumvarpi um dómsmál

Dómarafélag Íslands hefur lagst gegn lagafrumvarpi um breytingar á lögum um fréttaflutning af dómsmálum sem hefur það að markmiði að gera ákvæði um frásögn af skýrslutökum skýrari.

Frétt af mbl.is

Verði ekki hægt að stöðva umfjöllun vikum saman

Sigmar Guðmundsson, þingmaður Viðreisnar, mælti fyrir frumvarpinu fyrr í mánuðinum, en markmið þess er að tryggja aðgengi almennings að umfjöllun um dómsmál. Þá er frumvarpinu ætlað að koma í veg fyrir að hægt sé að stöðva umfjöllun um dómsmál í margar vikur í senn, líkt og gerðist fyrr á árinu þegar fjölmiðlabann stóð yfir um sjö vikna skeið við málsmeðferð stærsta kókaínmáls sem komið hefur upp hér á landi. Dómari ákvað áð fjölmiðlum væri óheimilt að greina frá því sem fram kom við skýrslutökur yfir allt það tímabil sem þær stóðu.

Dómarafélagið segir í umsögninni að til algjörra undantekninga heyri að skýrslur fyrir dómi taki svo langan tíma. Í lagaákvæðinu sé auk þess gert ráð fyrir því að dómari geti veitt undanþágu frá banni við að greina frá skýrslum vitna. Ákvæðinu sé jafnframt ætlað að tryggja að framburður vitnis í dómsmáli mengist ekki af framburði annarra vitna, en varúðarreglur séu til lítils ef vitni geti fylgst með því í gegnum fjölmiðla eða annars konar miðla hvað önnur vitni hafa borið fyrir dómi áður en það gefur skýrslu. Réttaröryggissjónarmið, hagsmunir aðila að dómsmálum og hætta á sakarspjöllum vegi þyngra en þau sjónarmið sem flutningsmenn frumvarpsins tefli fram, segir í umsögninni.