Sérfræðingar hjá Alþjóðaheilbrigðisstofnuninni (WHO) vöruðu í dag við því að sífelldir örvunarskammtar af upprunalega bóluefninu gegn Covid-19 væri ekki raunhæf stefna gegn nýjum afbrigðum og kölluðu eftir nýjum bóluefnum.
Sérfræðihópur sem Alþjóðaheilbrigðismálastofnunin stofnaði til að meta frammistöðu Covid-19 bóluefnanna sögðu í dag að örvunarskammtar af upprunalega bóluefninu væru ekki besta lausnin gegn Covid-19 vegna nýrra afbrigða veirunnar.
„Ólíklegt er að bólusetningaraðferð, þar sem notast er við endurtekningu á örvunarskömmtum af upprunalegu bóluefnasamsetningunni, sé viðeigandi eða sjálfbær,“ sagði sérfræðihópur stofnunarinnar í yfirlýsingu.
Þá kom einnig fram að þörf væri á því að núverandi bóluefni gegn veirunni verði uppfærð vegna nýrra afbrigða, eins og t.d. Ómíkron-afbrigðinu sem hefur breiðst hratt út á síðustu vikum og greinst í yfir 149 löndum.
Bent var á að nú væri unnið að yfir 331 bóluefnasamsetningum nýrra bóluefna út um allan heim en samkvæmt sérfræðihópnum gæti þurft að uppfæra samsetningu núverandi bóluefna þar til ný bóluefni hafa verið þróuð.