Enska knattspyrnufélagið Everton er ansi líklegt til að kaupa miðjumanninn Harry Winks af Tottenham en bæði lið leika í ensku úrvalsdeildinni.
Sky greinir frá að Tottenham hafi beðið enska miðjumanninn um að finna sér nýtt félag, þar sem hann er ekki í myndinni hjá knattspyrnustjóranum Antonio Conte. Frank Lampard, knattspyrnustjóri Everton, er mikill aðdáandi leikmannsins.
Winks var aðeins sex sinnum í byrjunarliði Tottenham í ensku úrvalsdeildinni á síðustu leiktíð. Þá færðist hann aftar í goggunarröðina er félagið keypti Yves Bissouma frá Brighton á dögunum.