HK tók á móti KA í fyrsta leik dagsins í Pepsi Max-deild karla. Úr varð hörkuleikur sem lauk þó með markalausu jafntefli.

Leikurinn fór fremur rólega af stað. Andri Fannar Stefánsson átti skot framhjá marki HK úr ágætis stöðu eftir um stundarfjórðungs leik. HK vildi svo fá víti á 27.mínútu þegar Ásgeir Börkur Ásgeirsson fór niður í teig KA eftir viðskipti við Ásgeir Sigurgeirsson.

Það kom töluvert meira líf í leikinn eftir því sem leið á fyrri hálfleik. Andri Fannar slapp til að mynda inn fyrir vörn HK þegar 15 mínútur lifðu hálfleiksins eftir stungusendingi frá Hallgrími Mar Steingrímssyni. Guðmundur Þór Júlíusson kom HK-ingum þó til bjargar.

Mikill hiti færðist einnig í leikinn og fengu nokkrar góðar tæklingar að fljúga.

Birkir Valur Jónsson átti svo síðasta markverða færi fyrri hálfleiks þegar skot hans lak framhjá stöng KA-manna.

Lið KA kom af nokkrum krafti inn í seinni hálfleik. Jonathan Hendrickx átti til að mynda flotta fyrirgjöf á Ásgeir Sigurgeirsson sem skaut framhjá. Þá átti Hendrickx sjálfur hörkuskot að marki HK sem Arnar Freyr Ólafsson varði.

Stuttu síðar átti Birnir Snær Ingason fyrirgjöf á Stefan Alexander Ljubicic. Sá síðarnefndi átti bara eftir að setja boltann í markið þegar Rodrigo Gomes kom norðanmönnum til bjargar.

Mikið fjör var í leiknum á þessum tímapunkti og átti Nökkvi Þeyr Þórisson, leikmaður KA, hættulega fyrirgjöf meðfram jörðinni fyrir mark HK en því miður fyrir KA rataði boltinn ekki á neinn gulan.

Birnir komst svo í flott færi hinum megin en Brynjar Ingi Bjarnason varðist honum vel.

Best færi leiksins fékk svo Stefan Alexander á 72. mínútu. Hann var þá sloppinn aleinn í gegn á móti Steinþóri Má Auðunssyni, Stubb. Sá síðarnefndi varði þó virkilega vel frá honum.

Þetta var síðasta dauðafæri leiksins. Markalaust jafntefli varð niðurstaðan í leik sem var þó fjörugur á köflum.

Þess má geta að Valgeir Valgeirsson, sem kom aftur til HK frá Brentford á dögunum, spilaði síðustu tíu mínúturnar í dag.