22 í einangrun á Djúpavogi
Unnur Freyja Víðisdóttir
Setja bókamerki
Kórónuveirufaraldurinn hefur verið að sækja í sig veðrið á Djúpavogi en þar eru nú minnst 22 í einangrun vegna veirunnar. Þetta staðfestir Óðinn Gunnar Óðinsson, skrifstofustjóri hjá Múlaþingi, sem var nýkominn af fundi með aðgerðarstjórn Austurlands þegar mbl.is náði tali af honum.
Ræddu stöðuna á faraldrinum á Austurlandi
Spurður segir hann efni fundarins hafa verið, eins og svo oft áður, stöðuna á faraldrinum á Austurlandi.
„Yfirleitt er það Covid sem er til umræðu á þessum fundum og einhverjar aðgerðir sem menn telja rétt að grípa til eða mögulegar leiðbeiningar til skólastjóra.“
Eftir því sem mbl.is kemst næst greindist fyrsta smitið frá upphafi faraldursins á Djúpavogi 3. janúar og var sá smitaði starfsmaður á leikskólanum Bjarkartúni.
Þegar upp komst um smitið var leikskólanum lokað, að því er Guðrún Sigríður Sigurðardóttir, leikskólastjóri á Bjarkatúni, greindi frá í samtali við mbl.is á fimmtudag.
Geta vonandi opnað leikskólann aftur á morgun
Í kjölfarið var ákveðið að ráðast í víðtæka skimun í bæjarfélaginu en fram að þessu hefur tvisvar verið skimað fyrir veirunni á heilsugæslunni á Djúpavogi, fyrst á laugardag og svo aftur í gær. Að sögn Óðins verður svo aftur skimað á fimmtudag.
Inntur eftir því segir hann niðurstöður úr sýnatökum gærdagsins ekki enn liggja fyrir. Fjöldi þeirra einstaklinga sem eru í einangrun vegna veirunnar í bæjarfélaginu sé þó 22, sem er fjölgun um tíu frá því í gær.
Þá segir hann leikskólann á Bjarkartúni enn vera lokaðan en að reiknað sé með því að hann verði opnaður aftur á morgun, reynist niðurstöður úr sýnatökum gærdagsins hagstæðar.
Hyggist þið grípa til sérstakra aðgerða til að hefta frekari útbreiðslu veirunnar á Djúpavogi?
„Nei, það var ekki ákveðið í dag. Við þurfum að sjá hvernig þetta þróast. Það eru hópsmit að koma upp víða eins og t.d. á Eskifirði. Það er samt alltaf til umræðu með skólastjórnendum. Fram að þessu hefur virkað best að loka grunn- og leikskólum en það hefur ekki verið ákveðið að gera neitt slíkt ennþá.“
Fyrsta 360 gráða yfirlitsmyndin frá goslokum
Eldgosinu lokið en getum búist við öðru
Mældist á 174 km hraða í gegnum vinnusvæði
Vill ekki „aumingjalegar“ lækkanir á röngum tíma
„Miklar líkur á rýmingu á næstu sólarhringum“
„Hætta á því að það dragi úr samstöðunni“
María Sigrún svarar Degi fullum hálsi
Kristrún og Bjarni tókust hart á um efnahagsmálin