Enski boltinn

Segir United betra eftir að orkusugurnar Pogba og Ronaldo fóru

Ingvi Þór Sæmundsson skrifar
Cristiano Ronaldo og Paul Pogba fóru frá Manchester United í fyrra.
Cristiano Ronaldo og Paul Pogba fóru frá Manchester United í fyrra. getty/Berengui

Roy Keane hrósaði Erik ten Hag í hástert eftir að Manchester United tryggði sér sæti í úrslitum enska deildabikarsins í gær. Hann sagði að United væri betra lið eftir brotthvarf tveggja stórstjarna.

United vann Nottingham Forest, 2-0, í seinni leik liðanna í undanúrslitum deildabikarsins í gær og einvígið 5-0 samanlagt. Keane er hrifinn af því sem Ten Hag hefur gert síðan hann tók við United í sumar.

„Þegar hann kom inn var United á botninum og við þurftum að tala um leikmenn sem voru á förum. Ég er ekki að skjóta á þessa leikmenn en þeir vissu samningur þeirra væri að renna út og þeir væru að fara og það hjálpaði ekki,“ sagði Keane og vísaði þar til leikmanna á borð við Jesses Lingard, Nemanjas Matic og Pauls Pogba sem yfirgáfu United í sumar.

Keane var einnig spurður út í Ronaldo sem yfirgaf United í lok síðasta árs eftir mikla dramatík.

„Enginn vildi hafa þetta hangandi yfir seinni hluta tímabilsins og það hefði átt að taka á þessu í sumar. Þessi Ronaldo staða. Það var augljóst að hann myndi ekki sitja sáttur á bekknum. En nú er búið að leysa þetta og er ekki lengur hangandi yfir félaginu,“ sagði Keane.

„Hann og aðrir aukaleikarar eru farnir. Núna koma aukaleikararnir inn á og eru tilbúnir á meðan þér fannst þeir vera orkusugur á síðasta tímabili.“

Næsti leikur United er gegn Crystal Palace í ensku úrvalsdeildinni á laugardaginn.


Tengdar fréttir

„Hjá Man United verður að halda á­kveðnum standard“

„Auðvitað er gaman að vinna undanúrslitaleiki en fyrri hálfleikurinn var ekki frábær ef ég á að vera hreinskilinn,“ sagði Erik Ten Hag um frammistöðu Manchester United í 2-0 sigrinum á Nottingham Forest í kvöld. Lærisveinar Ten Hag unnu fyrri leikinn 3-0 og voru komnir með annan fótinn á Wembley.




Fleiri fréttir

Sjá meira


×