Við vitum að staðan er ekki nógu góð

Skoska framherjanum Steven Lennon var skiljanlega létt eftir að hafa skorað sigurmark FH í 1:0-sigri á Fylki í úrvalsdeild karla í knattspyrnu, Pepsi Max-deildinni, í kvöld.

FH-ingar voru þar með að vinna sinn fyrsta deildarleik í tvo mánuði en Lennon sjálfur fór illa með nokkur góð færi snemma leiks ásamt Jónatani Inga Jónssyni samherja sínum. „Við hefðum sennilega átt að vera 3-4 mörkum yfir í hálfleik en ég og Jónatan nýttum ekki færin. En hvort sem þú vinnur með einu eða tíu mörkum, þá færðu þessi þrjú stig,“ sagði Lennon í samtali við mbl.is strax að leik loknum.

Frétt af mbl.is

FH-ingar biðu í 62 daga eftir deildarsigri

Lennon hefur verið einn besti markaskorari Íslandsmótsins undanfarin ár og spurði blaðamaður hvort hann hefði ekki verið ósáttur með sjálfan sig framan af leik. „Klárlega, ég á að skora úr svona færum en svona er þetta. Ef þú ert kaldur þá ertu kaldur en ég nældi svo í sigurmarkið og mikilvæg þrjú stig.“

FH vann tvo leiki gegn írska liðinu Sligo Rovers og hefur því nú unnið þrjá leiki í röð í öllum keppnum eftir erfiðar vikur. „Við vitum að staðan er ekki nógu góð í deildinni, en eftir tvo sigra í Evrópukeppninni og langþráðan sigur í deildinni getum við vonandi byggt á því, það eru mikilvægir leikir fram undan.“

• Blogga um frétt