Danny Murphy, fyrrum atvinnumaður í knattspyrnu og nú sparkspekingur, virðist ekki sérlega hrifinn af þeirri ákvörðun Heung-Min Son að skrifa undir nýjan samning við Tottenham.
Son skrifaði undir lok síðustu viku undir samning við félagið sem gildir til ársins 2025.
Murphy, sem lék með Tottenham á sínum tíma, segir ekki líklegt að Son muni vinna mikið af titlum með félaginu.
,,Leikmenn eru mjög mismunandi. Þegar einhverjum líður vel, nýtur lífsins og fótboltans, það eru ekki allir sem vilja það sama. Hann er örugglega að fá mjög góðan samning ef litið er á það út frá fjárhagslegu sjónarmiði. Það eru hins vegar líkur á því að hann vinni ekki mikið með Tottenham næstu árin. Sú er staðreyndin.“
Murphy hélt áfram og bætti við að samningurinn sé nokkurs konar merki um uppgjöf hjá Son.
,,Það skiptir hann greinilega ekki svo miklu að vinna eitthvað. Mér finnst þetta í raun gefa í skyn að hann hafi gefist upp.“
Miðjumaðurinn fyrrverandi hefur ekki trú á því að Tottenham muni takast að bæta sig á næstu árum. Liðið hafnaði í sjöunda sæti ensku úrvalsdeildarinnar á síðustu leiktíð.
,,Hann trúir því kannski að Tottenham geti snúið þessu við og keppt um eitthvað. Ég held samt að flestir þeir sem þekkja fótbolta sjái það ekki gerast á næstu leiktíð eða leiktíðum.“