Alþjóðaknattspyrnusambandið, FIFA, hefur úrskurðað sænska knattspyrnumanninn Pawel Cibicki í fjögurra ára keppnisbann fyrir veðmálasvindl.
Í september á síðasta ári dæmdi sænska knattspyrnusambandið Cibicki í fjögurra ára keppnisbann en náði það einungis yfir kappleiki í Svíþjóð.
Cibicki, sem er á mála hjá Pogon Szczecin í Póllandi, hefur því getað spilað fótbolta þar í landi, eða allt þar til nú að FIFA ákvað að fylgja fordæmi sænska knattspyrnusambandsins. Nær bannið því nú til allra aðildarlanda FIFA.
Málið lýtur að því að Cibicki er gefið að sök að hafa fengið viljandi gult spjald í leik með Elfsborg gegn Kalmar í sænsku úrvalsdeildinni árið 2019 og fengið greitt fyrir. Þá lék hann sem lánsmaður frá enska félaginu Leeds United.
Upphæðin sem Cibicki fékk greidda, um 4,3 milljónir íslenskra króna, sagði hann sjálfur að hafi einfaldlega verið lán.
Skömmu áður en leikur Kalmars og Elfsborg hófst voru 27 nýir veðmálareikningar stofnaðir og áttu þeir það allir sameiginlegt að veðja á að Cibicki myndi fá gult spjald í leiknum.
Cibicki var í desember síðastliðnum dæmdur í tveggja ára skilorðsbundið fangelsi í Svíþjóð vegna málsins.
Hann neitar alfarið sök, líkt og aðrir tveir aðilar málsins, og hafa allir þrír áfrýjað dómum sínum til Íþróttaráðs Svíþjóðar. Samkvæmt FIFA er hægt að breyta refsingum þeirra ef sænska íþróttasambandið kemst að annarri niðurstöðu en sænska knattspyrnusambandið komst að.