Ýmis mál komu til kasta lögreglunnar á höfuðborgarsvæðinu í dag. Meðal mála sem lögregla fékkst við voru þjófnaðir, innbrot og alelda hjólhýsi.
Um 11.30 í dag var tilkynnt um mann sem var að hoppa upp í bíla í miðbænum. Þá kemur fram að hann hafi hlaupið í burtu er lögreglu bar að garði. Rétt upp úr tólf var síðan tilkynnt um yfirstaðið innbrot í heimahúsi í miðbænum.
Um ellefuleytið var tilkynnt um þjófnað í matvöruverslun í Laugardalnum.
Um tvöleytið barst tilkynning um farþega sem neitaði að greiða fyrir fargjald í leigubíl í Laugardalnum. Sá var handtekinn en látinn laus að upplýsingatöku lögreglu lokinni.
Upp úr tvö var tilkynnt um mann sem hafði reynt að brjóta sér leið inn á stigaganga í nokkrum fjölbýlishúsum í Hlíðunum. Ekki er víst hvort nokkuð hafi verið tekið.
Rétt að verða þrjú í dag var tilkynnt um tilraun til innbrots í heimahús í Vesturbænum, sem líklega átti sér stað í nótt. Þá barst tilkynning um fjögurleytið um þjófnað á úlpu í fataverslun í miðbænum.
15:30 var tilkynnt innbrot í bifreið í bílakjallara í Hlíðunum. Tilkynnt var að eldur kom upp í hjólhýsi á Smiðjuvegi í Kópavogi laust eftir klukkan 17 í dag.