Rík­is­stjórn Íslands hefur ákveðið að setja 450 millj­ónir króna í við­spyrnu­að­gerðir í þágu tón­list­ar- og sviðs­lista­geir­anna vegna heims­far­ald­urs kór­ónu­veiru. 

Í til­kynn­ingu sem birt hefur verið á vef stjórn­ar­ráðs­ins vegna þessa kemur fram að þeir sem hafa helst tekjur af við­burð­ar­haldi hafi séð þær skreppa gríð­ar­lega saman á þeim 22 mán­uðum sem liðnir eru frá því að far­ald­ur­inn skall á. Þannig voru greiðslur til rétt­hafa í tón­list vegna tón­leika­halds á árinu 2021 til að mynda 87 pró­sent lægri en sam­svar­andi tekjur árið 2019. Auk þess hafi sjálf­stæð leik­hús og leik­hópar farið veru­lega illa út úr far­aldr­inum vegna sótt­varn­ar­að­gerða og lokanna. 

Á meðal aðgerða sem gripuð verður til er að eyrna­merkja fólki undir 35 ára aldri lista­manna­laun í fyrsta sinn. Það er gert ann­ars vegar þannig að 75 milljón króna við­bót­ar­fram­lag, alls 150 mán­að­ar­laun lista­manna, verður sett í starfs­laun lista­manna í gegnum launa­sjóð tón­list­ar­flytj­enda. Þar af verður úthlutun 50 mán­að­ar­launa bundin því skil­yrði að ungt tón­list­ar­fólk undir 35 ára aldri njóti góðs af þeim. Hins vegar verða 50 millj­ónir króna, alls 100 mán­að­ar­laun lista­manna, settar í starfs­laun lista­manna í gegnum launa­sjóð sviðs­lista­fólks og 50 mán­að­ar­laun verða „bundin því skil­yrði að ungt sviðs­lista­fólk undir 35 ára aldri njóti góðs af þeim.“

Fyrr í þessum mán­uði úthlut­aði Launa­sjóður lista­manna alls 1.600 mán­að­ar­launum til lista­manna. Kostn­aður vegna þeirra er 785 millj­ónir króna. Alls fengu 236 lista­menn úthlutað launum en 1.117 ein­stak­lingar eða hópar sóttu um. Því er ljóst að mun fleiri sótt­ust eftir að fá slík en fengu. Starfs­laun lista­manna eru 490.920 krónur á mán­uði sam­kvæmt fjár­lögum 2022. Um verk­taka­greiðslur er að ræða.

Þá mun rík­is­sjóður standa að 150 milljón króna greiðslu til tón­höf­unda, sem hafa séð tekjur sínar af tón­leika­haldi rýrna um 80 pró­sent milli 2019 og 2020 og álíka mikið milli 2020 og 2021. Tekjur af dans­leikja­haldi rýrn­uðu einnig um 82 pró­sent milli áranna 2019 og 2021. „Með fram­lag­inu er hægt að styrkja rétt­hafa beint í gegnum STEF sam­tök­in, en þeim verður falið að setja við­mið um úthlutun fjár­ins sem næðu hvoru­tveggja til þeirra sem höfðu tekjur af höf­unda­rétt­ar­gjöldum fyrir heims­far­ald­ur­inn og þeirra sem hafa komið nýir inn á mark­að­inn und­an­far­ið.“

Tón­list­ar­sjóður fær 50 milljón króna við­bót­ar­fram­lag til að styðja við við­burða­hald á árinu 2022, Hljóð­rita­sjóður fær 40 millj­ónir króna og ÚTON fær tíu millj­ónir króna til að koma til móts við íslenskt tón­list­ar­fólk sem sækir fram á erlendri grundu. Þá fær Tón­verka­mið­stöðin tíu millj­ónir króna.

Sviðs­lista­sjóður fær svo 25 millj­ónir króna til að styðja við við­burð­ar­hald á árinu 2022.