Innlent | mbl | 5.4.2021 | 16:58 | Uppfært 19:37

Gefur kost á sér í 3.-4. sæti

Halldóra Fríða Þorvaldsdóttir varabæjarfulltrúi og formaður velferðarráðs Reykjanesbæjar, gefur kost á sér í 3. sæti í Suðurkjördæmi Framsóknar.

Halldóra Fríða Þorvaldsdóttir, varabæjarfulltrúi og formaður velferðarráðs Reykjanesbæjar, gefur kost á sér í 3.-4. sæti í prófkjöri Framsóknar í Suðurkjördæmi sem fram fer 19. júní næstkomandi.

Þessu greinir hún frá í tilkynningu, svohljóðandi:

„Ég hef síðastliðin ár verið virk í starfi Framsóknar og unnið fyrir flokkinn og samfélagið okkar af heilindum og er mjög þakklát fyrir það traust sem mér hefur verið sýnt. Það hefur verið lærdómsríkt starf á krefjandi tímum að vera varabæjarfulltrúi í Reykjanesbæ og formaður velferðarráðs Reykjanesbæjar en á sama tíma mjög gefandi þegar maður sér mikla vinnusemi leiða af sér stór verkefni sem eru samfélaginu til góða.

Velferðar- og menntamál eru mér sérstaklega hugleikin. Í gegnum ólík verkefni hef ég kynnst krafti flokksmanna og trúi því að stefna flokksins og sá kraftur sem í okkur býr sé það sem þarf til að við rísum enn sterkari upp eftir þær áskoranir sem við höfum glímt við. Þar hefur Framsókn verið í fararbroddi og mér þætti mikill heiður að fá að taka aukinn þátt í þeirri viðspyrnu.

Ég, sem mikil samvinnukona, trúi því einnig að með samvinnuáherslum flokksins munum við halda áfram veginn sem fjölskylduflokkurinn Framsókn þjóðinni til heilla.“