Knattspyrnumaðurinn Sergio Ramos telur sig hafa áunnið sér rétt til þess að gera nákvæmlega það sem honum sýnist þegar samningur hans við Spánarmeistara Real Madríd rennur út í sumar.
Ramos, sem er fyrirliði Real Madríd og kom til félagsins árið 2005, hefur ekki enn gert nýjan samning við spænska stórveldið og má því ræða við önnur félög. Hann er sjálfur á því að vilja ekki spila áfram nema á hæsta stigi.
„Ég hef unnið mér inn þann rétt að gera nákvæmlega það sem ég vil. Ég vil spila á hæsta stigi og ef ég geri það ekki, þá verð ég frekar heima. Ef ég myndi ekki spila á hæsta stigi væri það ekki þess virði,“ segir Ramos í heimildaþáttunum The Legend of Sergio Ramos, sem verða frumsýndir á Amazon Prime-streymisveitunni á föstudaginn.
Ramos er orðinn 35 ára gamall en telur sig enn eiga nóg inni.