Krabbameinsfélag Íslands hefur skorað á stjórnvöld að leggjast á árar með félaginu og setja uppbyggingu fyrsta flokks framtíðaraðstöðu dagdeildar blóð- og krabbameinslækninga í forgang.
Félagið er tilbúið að leggja til allt að 450 milljónir króna til að bylta aðstöðu deildarinnar af því gefnu að stjórnvöld setji verkefnið í forgang, að því er kemur fram á vefsíðu félagsins.
Þeir sem fá lyfjameðferð við krabbameinum fá hana flestir á dagdeild blóð- og krabbameinslækninga á Landspítala.
Krabbameinsfélagið hefur lengi haft áhyggjur af aðstöðuleysi deildarinnar, og áhrif þess á þá sem fá og veita meðferð, að því er kemur fram á síðunni. Með hækkandi aldri fjölgar krabbameinum og á næstu 20 árum mun komum á dag- og göngudeild fjölga um 40 - 50%.
Félagið hefur kynnt málið fyrir heilbrigðisráðherra, fjármálaráðherra og velferðarnefnd Alþingis og skorar á stjórnvöld að sýna vilja í verki og bregðast skjótt við.
Krabbameinsfélagið hefur sett upp verkefnasíðu til að upplýsa um mikilvægi verkefnisins, þar sem hægt er að kynna sér málið frekar.