Kaupfélag Skagfirðinga hefur hætt framleiðslu á jurtapróteindrykkjum Teyg og ætlar að taka hann strax úr sölu í kjölfar frásagnar af ofbeldi af hálfu Arnars Grant. Arnar þróaði drykkinn í samstarfi við KS og Ívar Guðmundsson. Stundin greinir frá þessu.

„Þetta verður bara tekið úr sölu með öllu. Það tekur nokkra daga, við erum hættir að selja Teyg og hættir að dreifa vörunni, við erum að tæma hillur, við erum búin að loka Facebook-síðunni og Instagram-síðunni fyrir þessa vöru og erum að kúpla okkur algjörlega út úr þessu,“ segir Magnús Freyr Jónsson, framkvæmdastjóri Mjólkursamlags KS.

Stundin greinir frá því að KS eigi vörumerkið en samstarf við Arnar og Ívar hafi falist í þróun og markaðssetningu.  „Nú er bara kominn upp algjör forsendubrestur í því samstarfi og við kærum okkur ekkert um að halda því áfram,“ segir Magnús.

Hér má lesa frétt Stundarinnar í heild sinni.

Vítalía Lazareva greindi fyrst frá því á samfélagsmiðlinum Instagram í október að fjórir menn hefðu farið yfir mörk hennar í heitum potti í sumarbústaðarferð. Þar nafngreindi hún Arnar, sem var þáverandi ástmaður hennar, ásamt því að nafngreina Ara Edwald, Þórð Má Jóhannesson og Hreggvið Jónsson. Seinna sagði hún Loga Bergmann einnig hafa brotið á sér á hótelherbergi þar sem hún var með Arnari í golfferð.

Það var hins vegar ekki fyrr en eftir að Vítalía var í viðtali í þættinum Eigin Konur hjá Eddu Falak sem nöfnin rötuðu í fjölmiðla og hafa allir mennirnir síðan ýmist stigið til hliðar í sínum störfum eða verið reknir.