„Ég var ekki ánægður með fyrri hálfleikinn. Mér fannst við samt byrja leikinn sterkt en fjaraði síðan undir þessu. HK eru með gott lið og erfiðir hérna inni í Kórnum,” sagði Heimir Guðjónsson sáttur eftir 3:0 sigur á HK í Kórnum nú í kvöld.
„HK-ingar sköpuðu sér góð færi, við vorum pínulítið sjálfum okkur verstir og vorum að missa boltann á slæmum stöðum, hefðum mátt vera nær mönnunum okkar og vinna seinni bolta. Eftir að Patrick skoraði þetta mark þá fannst mér við spila á löngum köflum mjög vel í þessum leik.”
Það var allt annað Valslið sem kom á völlinn í seinni hálfleik og voru þeir mun sterkari en HK-ingarnir.
„Í hálfleik minnti ég bara strákana á að það var 0:0 í hálfleik uppi á Skaga og við töpuðum þeim leik og 1:0 yfir gegn Stjörnunni í Garðabænum og töpuðum þeim leik líka og við þyrftum að halda áfram og það var bara það eina sem ég ræddi. Ég er ekki með eitthverjar stórkostlegar ræður í hálfleik.
Fyrir þennan leik í kvöld voru Valsmenn búnir að tapa fjórum leikjum í röð.
„Mér fannst við svara því vel að koma hingað og vinna. Ég hef aldrei tapað áður fjórum leikjum í röð, held ég. Þannig að það var mjög fínt að vinna þennan leik.”
Á fimmtudaginn sl. spiluðu Valsmenn við Bodø/Glimt í Sambandsdeildinni og töpuðu þar 3:0 á heimavelli. Hvernig líst þér á seinni leikinn?
„Bara vel, það voru vonbrigði að við skyldum ekki spila betur á fimmtudaginn en 3:0 og við verðum að fara til Noregs og klára verkefnið með sæmd og ég met stöðuna þannig að það séu enn þá möguleikar og við verðum að trúa á þetta,” sagði Heimir að lokum.