Reynsluboltinn spilar brátt sinn fyrsta leik

Spænski miðvörðurinn Sergio Ramos hefur verið að glíma við meiðsli allt frá því að hann gekk til liðs við franska stórliðið París Saint-Germain í sumar og hefur því enn ekki spilað sinn fyrsta leik fyrir það.

Franska dagblaðið Le Parisien greinir hins vegar frá því að nú styttist í að hann spili sinn fyrsta leik og gæti hann jafnvel gert það næstkomandi föstudag þegar PSG mætir Angers í frönsku 1. deildinni.

Ramos er 35 ára gamall og batt enda á 16 ára dvöl sína hjá spænska stórveldinu Real Madríd í sumar eftir að hafa unnið allt sem hægt er að vinna þar.

Ramos meiddist á kálfa í síðasta mánuði en endurhæfing hans hefur gengið vel að undanförnu og getur Mauricio Pochettino, knattspyrnustjóri PSG, því að öllum líkindum nýtt sér krafta hans á föstudag,

Auk þess greinir Le Parisien frá því að landi Ramos, vinstri bakvörðurinn Juan Bernat, gæti einnig snúið aftur í leiknum gegn Angers eftir að hafa verið frá vegna alvarlegra hnémeiðsla í meira en ár.

• Blogga um frétt