Björgunarsveitir á höfuðborgarsvæðinu ásamt öðrum viðbragðsaðilum voru kallaðar út um hálftólf í dag vegna manns sem tilkynnt var um í sjónum við Hrakhólma sem eru rétt utan við Álftanes. Fljótlega kom í ljós að um var að ræða tvo menn.
Þetta kemur fram í tilkynningu frá Landsbjörgu. Segir þar að ekki sé ljóst hvort mennirnir hafi verið á báti eða kajak, eða hvernig það yfirleitt vildi til að þeir voru í sjónum. „Þegar viðbragðsaðilar komu á staðinn var annar maðurinn upp á skeri við Hrakhólma en hinn hafði rekið í burtu. Fannst hann skjótt og eru þeir báðir nú komnir í hendur sjúkraflutningamanna og virðast báðir í góðu ásigkomulagi,“ segir í tilkynningunni.