Arnar Gunnlaugsson, þjálfari ríkjandi bikarmeistara Víkings Reykjavíkur var gestur í Íþróttavikunni með Benna Bó ásamt Herði Snævari Jónssyni, íþróttastjóra Torgs.
Meðal þess sem rætt var um voru hugmyndir FIFA um stækkun HM. FIFA ætlar að ná inn 9 milljörðum punda í tekjur og með því þarf að fjölga leikjum á mótinu en nú þegar hefur liðum verið fjölgað á mótinu úr 32 í 48.
Benedikt Bóas, umsjónar maður Íþróttavikunnar spurði gesti sína hvort menn væru ekki komnir út í vitleysu með því að vera stækka HM.
„Jú að mínu viti,“ svaraði Arnar en bætti við: „Auðvitað eykur þetta möguleika okkar á HM sæti en ef við hugsum bara um sportið sjálft, fótboltann og gæði leikja, þá var þetta alveg á mörkunum á síðasta HM.“
Hörður bætti þá við:
„Ég var rosa neikvæður í gær þegar að ég las um þessi áform, en hugsaði síðan með mér að þetta væri kannski eini möguleikinn okkar til að ná aftur HM sæti. Við komumst aldrei aftur inn á 32 liða HM.“
