Strákarnir í 20 ára landsliðinu í íshokkí luku keppni með sæmd í B-riðli 2. deildar á heimsmeistaramótinu í Skautahöllinni í Laugardal í kvöld með því að sigra Mexíkó sannfærandi í lokaumferðinni, 7:0.
Þeir enduðu í fjórða sæti af sex liðum eftir að hafa tapað þremur fyrstu leikjunum en unnið tvo þá síðustu. Kínverjar sigruðu með 14 stig, Belgía fékk 13, Serbía 9, Ísland 6, Taívan 3 og Mexíkó tapaði öllum sínum leikjum.
Arnar Helgi Kristjánsson, Alex Sveinsson og Gunnlaugur Þorsteinsson skoruðu fyrir Ísland í fyrsta leikhluta og staðan var 3:0 að honum loknum.
Gunnlaugur, Daniel Otuoma og Alex skoruðu í öðrum leikhluta og staðan var þá orðin 6:0.
Hákon Magnússon skoraði sjöunda markið snemma í síðasta leikhlutanum og þar við sat.