Bandaríkin urðu í nótt fyrstu Þjóðadeildarmeistarar karla í fótbolta í Mið- og Norður-Ameríku. Bandaríkin höfðu betur gegn Mexíkó eftir magnaðan og framlengdan úrslitaleik, 3:2. Leikið var í Denver í Bandaríkjunum.
Jesús Corona kom Mexíkó yfir strax á 2. mínútu en Giovanni Reyna jafnaði á 27. mínútu og var staðan í hálfleik 1:1. Diego Lainez kom Mexíkó aftur yfir á 79. mínútu en aftur jöfnuðu Bandaríkjamenn, nú á 82. mínútu með marki frá Weston McKennie.
Staðan eftir venjulegan leiktíma var 2:2 og því þurfti að framlengja. Á 114. mínútu dró til tíðinda því Christian Pulisic, leikmaður Chelsea, náði í vítaspyrnu sem hann skoraði sjálfur úr.
Dramatíkin var ekki búin því á 120. mínútu fékk Mexíkó vítaspyrnu. Andrés Guardado steig á punktinn en varamarkmaðurinn Ethan Horvath sá við honum og Bandaríkjamenn fögnuðu sætum sigri.