Útför Filippusar í myndum

Jarðarför Filippusar, eiginmanns Elísabetar Englandsdrottningar, fór fram í dag í St. George-kapellu í Windsor-kastala. Athöfnin var fremur látlaus, miðað við konunglega útför, vegna sóttvarnaráðstafana en Elísabet Englandsdrottning þurfti að sitja ein við athöfnina vegna þeirra, þótt aðstandandi sæti tveimur sætum frá. Margar fallegar myndir voru teknar við útförina og má líta nokkrar þeirra hér að neðan. 

Justin Welby, erkibiskupinn af Kantaraborg, samdi og fór með bæn fyrir Filippus við útförina. Með bæninni heiðraði erkibiskupinn hollustu hins látna og skyldurækni hans. 

Filippus lést í Windsor-kastala föstudaginn níunda apríl, 99 ára gamall að aldri. 

Meðlimir konungsfjölskyldunnar gengu á eftir kistu Filippusar þegar hún var færð inn í kapelluna. Kistan var flutt til kastalans í breyttum Land Rover-jeppa sem Filippus sjálfur hjálpaði til við að hanna.

Eftir útförina þagði breska þjóðin í mínútu. 

Einhverjir óbreyttir borgarar hafa farið til Windsor til þess að heiðra Filippus en ekki var mikið um gestagang, vegna sóttvarnaráðstafana.