Robert Lewandowski skoraði frábært mark fyrir Bayern München þegar liðið vann 2:1-sigur gegn Dynamo Kiev í E-riðli Meistaradeildar Evrópu í knattspyrnu í Úkraínu í dag.
Lewandowski kom Þjóðverjunum yfir með frábærri hjólhestaspyrnu á 14. mínútu áður en Kingsley Coman tvöfaldaði forystu Bæjara með marki á 42. mínútu.
Denis Harmash klóraði í bakkann fyrir Dynamo Kiev á 70. mínútu en lengra komst úkraínska liðið ekki.
Bæjarar voru fyrir leik kvöldsins komnir áfram í sextán liða úrslit keppninnar en liðið er í efsta sætinu með fullt hús stiga með 15 stig. Dynamo Kiev er í neðsta sætinu með 1 stig.