Sveindís Jane Jónsdóttir, landsliðskona í knattspyrnu, skoraði eitt marka Wolfsburg þegar liðið gerði góða ferð til Freiburg og lagði heimakonur örugglega, 4:0, í þýsku 1. deildinni í dag.
Wolfsburg skoraði þrívegis í fyrri hálfleik þar sem Sveindís Jane skoraði þriðja markið í uppbótartíma fyrri hálfleiks.
Hún fór svo af velli á 56. mínútu.
Undir lok leiksins kom svo fjórða markið.
Wolfsburg hefur verið óstöðvandi á tímabilinu og er með fullt hús stiga, 33, eftir 11 leiki í deildinni.
Íslendingalið Bayern München kemur þar á eftir með 25 stig, og á leik til góða.