Fyrsta Covid-smitið utan sóttkvíar greindist í gær. Samkvæmt upplýsingum frá Hjördísi Guðmundsdóttur, upplýsingafulltrúa Almannavarna, er um að ræða mann sem kom til landsins fyrir skömmu og fór í tvær skimanir með sóttkví á milli. Hann greindist neikvæður í bæði skiptin.
Maðurinn fór síðan í þriðju skimunina þar sem hann var að fara til útlanda aftur og greindist þá með veiruna. Samkvæmt upplýsingum frá Hjördísi er nú beðið niðurstöðu mótefnamælingar sem mun skera úr um hvort um virkt eða óvirkt smit sé að ræða.
Hjördís telur að þetta atvik sé ekki merki um að veiran sé farin að grassera aftur í samfélaginu því maðurinn kom nýlega til landsins.