Fjögur hundruð fermetra verkfærahús er fallið í eldsvoða við bæinn Ytri-Víðivelli í Fljótsdal.
Húsið stendur í ljósum logum ásamt aðliggjandi hlöðu, sem þó er möguleiki á að bjarga, að sögn Harðar Guðmundssonar, eiganda verkfærahússins.
Hann kom að eldinum eftir að hafa verið á æfingu fyrir þorrablót í félagsheimilinu Végarði, sem stendur þar nærri.
„Þegar ég kom heim var allt fullt af reyk,“ segir hann í samtali við mbl.is.
Enginn búfénaður var í húsunum og hefur engum orðið meint af vegna eldsins, að sögn Harðar.
Segir hann líta út fyrir að eldurinn hafi kviknað undan viðarkyndara.
Slökkvilið frá Egilsstöðum er að störfum á staðnum og gengur slökkvistarf vel.
Héraðsmiðillinn Austurfrétt greindi fyrst frá eldsvoðanum í kvöld og sagði þá fyrstu bíla frá slökkviliðinu á Egilsstöðum nýkomna á staðinn.
„Vindur stendur þó frá öðrum húsum og þau því ekki í hættu vegna eldsins,“ sagði í umfjöllun fréttavefsins.
Fréttin hefur verið uppfærð.