Hægt á kolmunnaveiðum við Rockall

Dregið hefur úr kolmunnaveiðunum á miðunum suðvestur af Rockall. „Það kemur ekki á óvart að sé að draga úr veiðinni þarna á þessum tíma og má segja að það sé í samræmi við reynslu fyrri ára,“ segir Tómas Kárason, skipstjóri á Beiti NK, í færslu á vef Síldarvinnslunnar.

Beitir lagði við bryggju í Neskaupstað aðfararnótt laugardags með 1.100 tonn af kolmunna. „Við fengum þessi 1.100 tonn í fjórum holum. Fyrstu tvö holin voru ágæt en hin síðari mjög léleg,“ segir Tómas.

Þegar Beitir mætti á miðin við Rockall var Hoffell SU að klára sinn túr, að sögn skipstjórans sem telur engin íslensk skip séu á veiðum á svæðinu núna.

„Hinsvegar voru þarna þrjú rússnesk skip og ein fjögur færeysk þegar við lögðum af stað heim á leið. Síðan eru Norðmenn að veiðum innan ESB- lögsögunnar og sennilega írsk skip einnig. Við fengum virkilegt leiðindaveður á heimleiðinni rétt áður en komið var í íslenska lögsögu. Þarna var 40 metra vindur og 14 metra ölduhæð. Það gekk mikið á meðan þetta stóð yfir,“ útskýrir Tómas.

Næst á dagskrá hjá áhöfninni á Beiti er verðskuldað páskaleyfi og er gert ráð fyrir að haldið verði til kolmunnaveiða á ný í byrjun apríl, en þá í færeyskri lögsögu. „Menn eru bjartsýnir á veiðina í færeysku og það var svo sannarlega fín viðbót að taka kolmunnatúra niður á Rockall,” segir Tómas í færslunni.

• Blogga um frétt