Samúel á skotskónum gegn stórliðinu

Samúel Kári Friðjónsson knattspyrnumaður frá Keflavík skoraði mark Atromitos í kvöld þegar liðið gerði jafntefli við meistaraliðið Olympiacos í grísku úrvalsdeildinni í knattspyrnu, 1:1.

Cedric Bakambu kom Olympiacos yfir snemma í síðari hálfleiknum en Samúel jafnaði metin tíu mínútum síðar en þetta er annað mark hans fyrir liðið í sextán leikjum í deildinni í vetur.

Samúel og Viðar Örn Kjartansson voru báðir í byrjunarliði Atromitos og var báðum skipt af velli tíu mínútum fyrir leikslok. Markvörðurinn Ögmundur Kristinsson var ekki í leikmannahópi Olympiacos.

Í kvöld vann PAOK með Sverri Inga Ingason í vörninni allan tímann glæsilegan útisigur á toppliðinu Panathinaikos, 3:0. Hörður Björgvin Magnússon lék ekki með Panathinaikos sem er með 45 stig á toppnum, AEK er með 44, PAOK 39 og Olympiacos 39. Atromitos er í sjöunda sætinu með 24 stig.

• Blogga um frétt