Knattspyrnumaðurinn Kolbeinn Birgir Finnsson hefur gert tveggja og hálfs árs samning við danska úrvalsdeildarfélagið Lyngby. Hann kemur til félagsins frá Dortmund í Þýskalandi.
Kolbeinn hefur leikið með varaliði Dortmund frá árinu 2019 í þriðju efstu deild Þýskalands, en hann lék aldrei með aðalliði félagsins.
Hann er uppalinn hjá Fylki en fór ungur að árum til Groningen í Hollandi, þar sem hann lék með varaliði félagsins. Eftir það lá leiðin til Brentford á Englandi, þar sem hann lék einnig með varaliðinu. Hann var lánaður til Fylkis seinni hluta sumarsins 2019 og stóð sig vel.
Í kjölfarið var hann keyptur til Dortmund, þar sem hann lék yfir 70 leiki í þriðju deild. Kolbeinn hefur leikið tvo A-landsleiki og fjölmarga leiki fyrir yngri landsliðin.
Kolbeinn verður samherji Sævars Atla Magnússonar og Alfreðs Finnbogasonar hjá Lyngby. Freyr Alexandersson þjálfar liðið.
Lyngby er nýliði í efstu deild og er liðið í botnsæti deildarinnar með átta stig, sex stigum frá Aalborg sem er í sætinu fyrir ofan.
KOLBEINN FINNSSON TIL LYNGBY 🇮🇸 ✍️ Vi henter den 23-årige islænding Kolbeinn Finnsson i tyske Dortmund på en aftale frem til sommeren 2025! Læs mere her: https://t.co/rBHz4YchSG #sldk #SammenforLyngby #LyngbyBK pic.twitter.com/QsGUaDOroH
— Lyngby Boldklub (@LyngbyBoldklub) January 25, 2023