Það er langt til Ástralíu og Nýja-Sjálands. Ekki bara í kílómetrum. Möguleikarnir á að veita Evrópumeisturum Hollendinga alvörusamkeppni um sigur í C-riðli undankeppninnar fyrir heimsmeistaramót kvenna í fótbolta sem haldið verður í Eyjaálfu árið 2023 eru strax orðnir takmarkaðir eftir 0:2-ósigur gegn þeim á Laugardalsvellinum í gærkvöld.
Vissulega er aðeins einn leikur búinn af átta og enn 21 stig eftir í pottinum. En Hollendingar tapa varla mörgum fyrir utan þau sem þeir misstu óvænt til Tékka í jafnteflisleik liðanna síðasta föstudag og það er því rétt að búa sig undir slag við tékkneska liðið um annað sæti riðilsins og að komast á þann hátt í umspilið.
Næsti leikur Íslands er einmitt heimaleikur við Tékka á Laugardalsvellinum 21. október. Eftir rúmar fjórar vikur. Það gæti reynst mikilvægasti leikurinn – lykillinn að framhaldinu. Það verður allavega nokkurs konar úrslitaleikur fyrir framhaldið þar sem ekkert annað en sigur kemur til greina fyrir íslenska liðið.
- Hallbera Guðný Gísladóttir lék sinn 120. landsleik fyrir Íslands hönd. Aðeins Sara Björk Gunnarsdóttir (136), Katrín Jónsdóttir (133) og Margrét Lára Viðarsdóttir (124) eiga fleiri A-landsleiki að baki.
Greinina má sjá í heild sinni á íþróttasíðum Morgunblaðsins í dag.