Maðurinn sem sló til starfsmanns Krónunnar í dag og neitaði að yfirgefa húsnæði verslunarinnar í Skeifunni var staðinn að búðarhnupli.
Samkvæmt upplýsingum frá lögreglunni á höfuðborgarsvæðinu situr maðurinn í gæsluvarðhaldi og bíður þess að vera yfirheyrður.
Maðurinn ku hafa verið allsgáður en á þessum tímapunkti er ekki vitað hvað honum gekk til með hátterni sínu. Lögregla handtók manninn á staðnum. Hafði hann þá neitað að yfirgefa verslunina.
„Þetta snérist um búðarhnupl og starfsmenn höfðu afskipti af honum. Hann ræðst síðan á starfsmann og bíður þess að vera yfirheyrður vegna þessa máls,“ segir Skúli Jónsson aðstoðaryfirlögregluþjónn hjá lögreglunni á höfuðborgarsvæðinu.